Kryeministri Edi Rama ndodhet sot në qytetin e Fierit, ku duket se ka nisur një tjetër fazë të pastrimit administrativ në nivel lokal. Sipas burimeve nga mbledhja e zhvilluar me drejtues vendorë, Rama ka kërkuar dorëheqjen e të gjithë drejtorëve të bashkisë, përfshirë edhe dy nënkryetarët dhe drejtuesit e departamenteve kryesore.

“Vala e shkarkimeve do të përfshijë të gjithë, pa përjashtim”, konfirmojnë burime brenda takimit, duke theksuar se ky veprim nuk është i izoluar, por pjesë e një procesi më të gjerë riorganizimi dhe disiplinimi administrativ në nivel lokal.

Ky është rasti i dytë brenda pak ditësh që kreu i qeverisë kërkon “dorëheqje masive” nga strukturat drejtuese në bashki. Vetëm pak ditë më parë, e njëjta skemë u aplikua në Vlorë, ku pas një takimi me Ramën, të gjithë drejtorët e bashkisë dhanë dorëheqjen.

Mbetet për t’u parë nëse ky “model Vlorë-Fier” do të shtrihet edhe në qytete të tjera të vendit, si pjesë e fushatës së paralajmëruar nga Rama për “çlirimin e administratës lokale nga paaftësia dhe abuzimi”.