Një nga viruset më të përhapur në botë, Epstein-Barr (EBV), mund të rrisë ndjeshëm rrezikun për disa lloje kanceri, sipas një studimi të ri të publikuar nga Agjencia Ndërkombëtare për Kërkime mbi Kancerin (IARC), pjesë e Organizatës Botërore të Shëndetësisë.
EBV është një virus që shumica e njerëzve e marrin gjatë jetës së tyre, zakonisht në fëmijëri ose rini. Ai përhapet përmes pështymës dhe lëngjeve të tjera trupore dhe zakonisht kalon pa simptoma, ndonëse mund të shkaktojë mononukleozën – të njohur si “sëmundja e puthjes”. Por studimi i ri sjell të dhëna tronditëse: virusi mund të rrisë ndjeshëm mundësinë për t’u prekur nga disa forma të rënda të kancerit.
Në një analizë që përfshiu rreth 74,000 persona në Kinën jugore, studiuesit ndoqën gjendjen e tyre shëndetësore për më shumë se një dekadë. Gjatë kësaj periudhe, u identifikuan 1,990 raste me kancer, dhe u matën nivelet e antitrupave ndaj EBV-së në organizmin e pjesëmarrësve. Ata që kishin antitrupa – shenjë se ishin infektuar më parë me virusin – rezultuan me një rrezik pesëfish më të lartë për t’u prekur nga kanceri.
Rreziku më i madh: kanceri nazofaringeal
Rreziku më i lartë u vu re për kancerin nazofaringeal – një formë e rrallë që prek pjesën e fytit pas hundës. Personat me EBV kishin deri në 26 herë më shumë gjasa për ta zhvilluar këtë lloj kanceri. Po ashtu, u evidentua lidhje e fortë mes EBV-së dhe rritjes së rrezikut për kancer të mushkërive, mëlçisë dhe limfoma.
Sipas Dr. Zisis Kozlakidis, një nga autorët e studimit dhe zyrtar i lartë në IARC, ky studim ndihmon në sqarimin e ndikimit afatgjatë që një infeksion viral i zakonshëm mund të ketë mbi shëndetin. Ai theksoi se ky zbulim hap rrugën për strategji të reja të diagnostikimit të hershëm dhe monitorimit të personave me rrezik të lartë.
Kujdes në interpretim
Studiuesit theksojnë se rezultatet vlejnë për zonën gjeografike ku është kryer studimi dhe se faktorë të tjerë – si duhani, dieta apo ndotja e ajrit – mund të kenë ndikuar në rezultatet. Megjithatë, lidhja mes EBV-së dhe disa llojeve kanceri është tashmë më e qartë se kurrë.
Ky zbulim riafirmon nevojën për kërkime të mëtejshme mbi ndikimin e viruseve në shfaqjen e kancerit dhe mund të sjellë diskutime të reja për zhvillimin e një vaksine kundër EBV-së në të ardhmen.
