E njohur fillimisht si një aksesor i thjeshtë për udhëtimet ajrore, e ideuar për të mbajtur qeset e të vjellave në avion, çanta “Birkin” është kthyer ndërkohë në një simbol absolut luksi dhe stili. Sot, modeli origjinal që i përket vetë ikonës së modës Jane Birkin, pritet të shitet për qindra mijëra euro, njofton agjencia AP.

Shtëpia e ankandeve “Sotheby’s” është ajo që do të nxjerrë në shitje çantën e rrallë, të krijuar posaçërisht për aktoren, këngëtaren dhe muzën britanike, në vitin 1984, nga gjiganti francez i modës Hermès.

Historia e çantës lindi nga një takim i rastësishëm në avion, gjatë një fluturimi për në Londër, ku Birkin u gjend pranë presidentit të atëhershëm të Hermès, Jean-Louis Dumas. E shqetësuar për mungesën e një çante praktike, por elegante, Birkin e hodhi idenë me zë të lartë — dhe Dumas vendosi t’ia realizonte. Kështu lindi “Birkin”, një legjendë në botën e modës.

Sot, “Birkin” është shumë më tepër se një çantë. Ajo është një status symbol, me çmime që variojnë nga dhjetëra mijëra deri në qindra mijëra euro, dhe me lista pritjeje që zgjasin me vite.

Dalja në ankand e çantës origjinale shënon një moment të rrallë në historinë e modës — jo vetëm për koleksionistët, por edhe për adhuruesit e kulturës, artit dhe elegancës që nuk njeh kohë.