Një ngjarje e rëndë është regjistruar këtë të enjte në plazhin e Qerretit, ku një 59-vjeçar nga Kosova ka humbur jetën tragjikisht, dyshohet si pasojë e arresti kardiak ndërsa ndodhej në det.

Sipas të dhënave paraprake të policisë, viktima ka pësuar komplikacione shëndetësore menjëherë pasi është futur në det dhe ka humbur ndjenjat. Megjithatë, pushuesit që ndodheshin në vendngjarje japin një tjetër version, duke ngritur akuza serioze ndaj shërbimit të ambulancës për vonesë dhe mungesë profesionalizmi.

Sipas dëshmitarëve okularë, 59-vjeçari ishte futur në ujë bashkë me dhëndrin, por ky i fundit kishte dalë më parë në breg. Kur pushuesit panë burrin në vështirësi, ndërhynë menjëherë dhe e nxorën nga deti, duke i dhënë ndihmën e parë. Ata thanë se kanë lajmëruar menjëherë ambulancën, por kjo e fundit ka mbërritur mbi një orë më vonë.

“E tmerrshme të shikoje sesi përpëlitej për ndihmë, ndërkohë që mjekët e rinj nuk dinin ç’të bënin”, u shpreh një dëshmitare për mediat. Ajo shtoi se pas përpjekjeve me elektroshok, gjilpëra dhe shtypje në kraharor, mjekët nuk arritën të rikthenin në jetë 59-vjeçarin, i cili kishte probleme me zemrën dhe diabetin.

Trupi i viktimës u transportua me barelë, ndërsa policia konfirmoi zyrtarisht vdekjen në vend. Pushuesit shprehën shqetësim për mungesën e emergjencave mjekësore të pajisura dhe të gatshme në vijën bregdetare, duke theksuar se raste të tilla tragjike mund të parandalohen me ndërhyrje në kohë.

Ngjarja ka shkaktuar tronditje dhe zemërim, ndërsa autoritetet pritet të hetojnë mbi dinamikën dhe veprimet e ekipeve mjekësore të thirrura në ndihmë.