PRISHTINË – Diplomati i lartë amerikan, Brendan Hanrahan, përfaqësues i Zyrës së Departamentit amerikan të Shtetit për Çështje Evropiane dhe Euroaziatike, zhvilloi një sërë takimesh me liderë politikë të Kosovës pasditen e së dielës, në një vizitë që u vlerësua si sinjal i angazhimit të SHBA-së në stabilitetin e vendit.

Në takime të veçanta, Hanrahan u takua me kryetarin e PDK-së, Memli Krasniqi, anëtaren e LDK-së, Hykmete Bajrami, si dhe me përfaqësues të Listës Serbe, partisë kryesore të serbëve në Kosovë.

Memli Krasniqi theksoi në deklaratën e tij pas takimit se diskutimi ishte i përqendruar në zhvillimet politike brenda dhe jashtë Kosovës, duke nënvizuar përkushtimin e PDK-së për bashkëpunim dhe gjetje zgjidhjesh që i shërbejnë qytetarëve. Ai shtoi se u nënvizua rëndësia e një marrëveshjeje përfundimtare mes Kosovës dhe Serbisë, që duhet të përfshijë njohjen reciproke si qendër të saj, duke falënderuar SHBA-në për rolin e pazëvendësueshëm në garantimin e paqes dhe stabilitetit në rajon.

Nga ana tjetër, Hykmete Bajrami, përfaqësuese e LDK-së, foli për krizën institucionale që ka mbërthyer Kosovën, me theks në dështimin e konstituimit të Kuvendit që prej zgjedhjeve të 9 shkurtit. Ajo tha se LDK-ja ka propozuar krijimin e një qeverie kalimtare, që do të zgjidhte bllokadën aktuale politike dhe do të siguronte funksionimin institucional deri në zgjedhjet presidenciale të vitit 2026. Bajrami shtoi se partia e saj është e gatshme të diskutojë edhe modele të tjera gjithëpërfshirëse që sjellin stabilitet në vend.

Kjo vizitë e Hanrahan është e para nga një përfaqësues i lartë i administratës së re amerikane në Kosovë dhe vjen në një moment delikat për skenën politike, ku mungesa e konsensusit rreth institucioneve ka sjellë paralizë parlamentare dhe paqartësi për drejtimin e ardhshëm të vendit.