Një zjarr masiv përfshiu lagjen e Shimve në Rrogozhinë, duke shkaktuar dëme të mëdha në mjedis dhe duke rrezikuar banesat përreth. Zjarri u përhap me shpejtësi për shkak të erës së fortë, duke djegur rreth 10 hektarë tokë me bimësi, qindra pemë ulliri dhe pemë frutore.

Shërbimet e Policisë dhe zjarrfikëses ndërhynë menjëherë në vendngjarje dhe pas disa orësh arritën të vënë nën kontroll flakët. Ndërkohë, Policia nisi menjëherë hetimet për identifikimin e autorit.

Brenda pak minutash u bë e mundur kapja dhe arrestimi i shtetasit Iljaz Rusta, 41 vjeç, banues në Rrogozhinë, i dyshuar si shkaktar i zjarrit. Sipas hetimeve paraprake, ai kishte ndezur zjarr në oborrin e një banese për të djegur mbeturina, por për shkak të kushteve atmosferike, flakët dolën jashtë kontrollit.

Rusta akuzohet për veprën penale “Shkatërrimi me zjarr i mjedisit pyjor” dhe materialet procedurale i janë referuar Prokurorisë për veprime të mëtejshme. Autoritetet bëjnë thirrje për kujdes maksimal në përdorimin e zjarrit në ambiente të hapura, sidomos gjatë ditëve me rrezik të lartë zjarresh.