Nga sot, në të gjithë territorin e Shqipërisë ka nisur një aksion i gjerë i Administratës Tatimore për kontrollin e subjekteve që tregtojnë produkte ushqimore dhe blegtorale. Qëllimi i këtij aksioni është formalizimi i sektorit dhe garantimi i sigurisë ushqimore në mbrojtje të konsumatorit.
Drejtoria e Përgjithshme e Tatimeve njoftoi se më 7 korrik ka informuar rreth 12 mijë tatimpagues përmes platformës zyrtare dhe sistemit të e-Filing, duke u kërkuar që çdo mall të shoqërohet me faturë tatimore të fiskalizuar, si në rastet e blerjes nga prodhuesit bujqësorë, ashtu edhe në shitjet drejt konsumatorit final.
Sipas udhëzimeve zyrtare:
• Çdo produkt bujqësor apo blegtoral duhet të shoqërohet me faturë të fiskalizuar të blerjes, ku të jetë e pasqyruar qartë origjina e produktit dhe identiteti i shitësit.
• Gjithashtu, në momentin që produkti i shitet konsumatorit, duhet të lëshohet faturë e fiskalizuar, ku të figurojë saktë emërtimi dhe çmimi i produktit.
Autoritetet paralajmërojnë se subjektet që nuk respektojnë këto rregulla do të përballen me masa administrative dhe penale, përfshirë gjoba dhe, në raste të rënda, ndalim aktiviteti.
Kontrollet do të shtrihen në tregjet me shumicë dhe pakicë, dyqane, pika grumbullimi, thertore dhe operatorë që ofrojnë shërbime të lidhura me prodhimin dhe tregtimin e produkteve ushqimore.
Kjo fushatë vjen në një kohë kur strukturat shtetërore po thellojnë përpjekjet për të siguruar standarde më të larta në sigurinë ushqimore dhe për të luftuar ekonominë informale në sektorin bujqësor.
