Autoritetet greke kanë vënë në pranga autorin e dyshuar të atentatit të ndodhur më 13 korrik në Athinë ndaj shtetasit turk Volkan Ertas. I arrestuari është një 22-vjeçar shqiptar, Alesio Biba, i cili ka pranuar autorësinë e ngjarjes dhe ka zbuluar se vepronte me urdhër të një mafiozi turk.

Sipas hetimeve, sulmi u porosit nga Suleyman Dalgic, një emër i njohur për drejtësinë turke, i arrestuar më herët për gjashtë vrasje. Dalgic kishte kontaktuar me Ertas duke i premtuar shlyerjen e një borxhi përmes dorëzimit të një automjeti. Por pas dyshimeve për një kurth, Ertas u përpoq të futej në një lokal në lagjen Peristeri, ku ndodhi edhe atentati.

Ertas u qëllua me katër plumba, ndërsa një efektiv policie grek, Dh. P., i cili ishte pronari i lokalit, mbeti i plagosur rastësisht. Fatmirësisht, të dy të plagosurit i shpëtuan rrezikut për jetën.

Në momentin e arrestimit, Biba tentoi të shkatërrojë celularin e tij duke e përplasur në tokë, por nuk arriti të fshihte provat. Nga kontrolli në banesën e tij, u sekuestruan:
• Një pistoletë “Grand Power MK7” me një krehër me 15 fishekë
• Një krehër pa fishekë
• 29 fishekë dhe një fishek “Luger”
• Një celular “Samsung” dhe 4 paketa me numra celularë
• Një letër me udhëzime për GPS Tracker makinash
• Një kartë SIM

Autoritetet greke po vijojnë hetimet për të zbuluar të gjitha lidhjet e Biba-s me grupin kriminal që dyshohet se vepron në disa vende të Europës dhe që ka shtrirje të fortë në trafikun e armëve dhe atentate me pagesë.