Një kontroll blic i urdhëruar nga Prokuroria e Elbasanit ka çuar në një zbulim të papritur: 30 plumba pistolete u gjetën në banesën e Denis Hasallës, Drejtor Kabineti në Bashkinë Peqin, gjatë një aksioni që përfshiu zyrtarë të shtatë bashkive të qarkut Elbasan.

Kontrollet janë pjesë e një hetimi në vijim për keqmenaxhimin e inceneratorit të Elbasanit dhe rolin e shoqërisë “ECO-ELB”. Sipas burimeve zyrtare, verifikimet janë përqendruar te banesat e zëvendës-kryetarëve të bashkive, drejtorëve juridikë, të financave dhe të kabinetit — persona që kanë pasur përgjegjësi direkte mbi kontratën dhe mbikëqyrjen teknike të veprimtarisë së “ECO-ELB”.

Denis Hasalla, një prej personave të kontrolluar, është përgjegjës për ndjekjen e çështjeve që lidhen me inceneratorin në Peqin. Ai është gjithashtu vëllai i deputetit socialist të Elbasanit, Saimir Hasalla, dhe dhëndër i ish-deputetit Aqif Rakipi, figurë me ndikim politik në zonë.

Prokuroria nuk ka bërë ende të ditur nëse ndaj Hasallës do të ngrihen akuza lidhur me municionin e gjetur në banesë. Në kuadër të të njëjtit hetim, është kontrolluar edhe banesa e administratorit të një shoqërie private nënkontraktore të “ECO-ELB”, që merret me sistemimin e mbetjeve urbane në landfill.

Burime të afërta me hetimin thanë se operacioni synon të identifikojë shkeljet e mundshme ligjore në menaxhimin e inceneratorit, përfshirë konfliktin e interesit, shpërdorimin e detyrës dhe favorizimet e mundshme për kontraktorët privatë.

Hetimet pritet të zgjerojnë rrethin e personave të përfshirë, ndërsa prokuroria po shqyrton dokumentacionin dhe provat e sekuestruara gjatë kontrolleve.