Një aksident i rëndë me pasojë vdekjen ka ndodhur mëngjesin e sotëm në rrugën e Arbrit, në dalje të qytetit të Peshkopisë. Viktima është identifikuar si Bledar Spahiu, 43 vjeç, punonjës i Agjencisë së Zonave të Mbrojtura në Dibër.

Sipas informacioneve paraprake, ngjarja ka ndodhur rreth orës 10:00, kur Spahiu dyshohet se ka humbur kontrollin mbi automjetin që drejtonte, i cili ka dalë nga rruga dhe ka rënë disa metra më poshtë. Ai u transportua fillimisht në spitalin e Dibrës me shenja jete, por ndërroi jetë gjatë rrugës për në Spitalin e Traumës në Tiranë, për shkak të plagëve të rënda.

Sipas burimeve zyrtare, Bledar Spahiu ishte nisur drejt Peshkopisë për t’iu bashkuar ekipeve zjarrfikëse që po punojnë për shuarjen e zjarrit në Parkun Kombëtar “Lurë – Mali i Dejës”, ku prej ditësh situata paraqitet e vështirë për shkak të flakëve që kanë përfshirë një pjesë të madhe të sipërfaqes pyjore.

Policia lokale konfirmoi ngjarjen me një njoftim zyrtar:

“Rreth orës 10:00, në dalje të qytetit të Peshkopisë, shtetasi B.S., dyshohet se ka humbur kontrollin mbi drejtimin e automjetit dhe automjeti ka dalë nga rruga duke rënë disa metra poshtë saj. Si pasojë e dëmtimeve të marra, drejtuesi i automjetit ka humbur jetën, gjatë transportimit për në spitalin e Traumës Tiranë.”

Grupi hetimor ndodhet në vendngjarje dhe po punon për të përcaktuar rrethanat dhe shkakun e aksidentit. Ngjarja ka shkaktuar tronditje të thellë në komunitetin lokal dhe në radhët e strukturave të mbrojtjes së mjedisit në Dibër.