Një dëshmi tronditëse ka dalë në dritë pas vrasjes së 56-vjeçarit Anesti Rama në fshatin Frashër të Patosit, ku dyshohet se ai është mbytur me tel nga vajza e tij, Emanilda Rama, ndërsa e shoqja ndihmoi për të fshehur gjurmët.

Ferdinand Rama, vëllai i viktimës, nga Greqia ku jeton prej vitesh, ka folur për mediat, duke zbuluar tensionet që ekzistonin prej kohësh në familje.

“Kisha dy vjet e gjysmë pa folur me vëllanë tim, sepse gruaja e tij nuk e lejonte. Ishin të shkëputur nga pjesa tjetër e familjes. Kishim dëgjuar që nuk shkonin mirë bashkë, ajo vetë thoshte: ‘Nuk e dua burrin. Merreni, bëni çfarë të doni’”.

Ferdinandi tregon se lajmin për vdekjen e mori nga kunata e tij, e cila i telefonoi për të njoftuar:

“Gruaja ime mori telefonatën. I thanë që Anesti ka vdekur”.

Ai shton se, për shkak të mungesës së kontakteve direkte, shëndetin e të vëllait e mësonte nëpërmjet një vëllai tjetër:

“Pyetja gjithmonë si është, më thoshin: është mirë, por pak i dobët, ka pak kollë”.

Hetimet: Një familje që fshihte konflikte të thella

Sipas burimeve nga grupi hetimor, vajza 26-vjeçare ka përdorur një mjet strangulues (tel) për të vrarë babanë, ndërsa e ëma ka ndihmuar në fshehjen e krimit, duke larë dhe pastruar trupin për të maskuar dhunën si një vdekje natyrale.

Ekspertiza mjeko-ligjore ka zbuluar shenja dhune në qafën e viktimës, ndërsa hetuesit janë duke analizuar të gjitha provat për të zbardhur të plotë ngjarjen, që ka tronditur opinionin publik.

Familja Rama, që në pamje të jashtme dukej e mbyllur dhe e qetë, rezulton të kishte përplasje të rënda brenda mureve të shtëpisë – një realitet i dhimbshëm që përfundoi në mënyrën më tragjike të mundshme.