Sardenja po përballet me një tjetër ditë dramatike, ndërsa zjarret vijojnë të përhapen në disa zona të ishullit. Situata më kritike është regjistruar pranë plazhit Molentis, në Villasimius, ku flakët janë afruar rrezikshëm pranë bregdetit, duke bllokuar rrugët e evakuimit dhe duke vënë në rrezik jetën e qindra pushuesve.

Mediat italiane raportojnë se ndërhyrja e menjëhershme e Rojeve Bregdetare të Cagliarit dhe e njësive detare speciale ka bërë të mundur shpëtimin e mbi 140 personave përmes detit. Vetëm me patrullën bregdetare “Cp320” u evakuuan 102 pushues, ndërsa 39 të tjerë u shpëtuan nga mjetet e policisë financiare.

Operacionet e shpëtimit u vështirësuan nga erërat e forta që kanë përfshirë jugun e ishullit, duke përhapur flakët me shpejtësi. Në përpjekje për të dalë nga zona, shumë qytetarë u drejtuan tek makinat e parkuara afër plazhit, por mbi 200 automjete mbetën të rrezikuara dhe disa prej tyre u përfshinë nga zjarri.

Autoritetet lokale dhe ekipet e emergjencës po punojnë pa ndërprerje për të kontrolluar vatrat dhe për të evakuuar plotësisht zonën, ndërsa situata mbetet e paqëndrueshme për shkak të kushteve të vështira atmosferike.