Barcelona ka vendosur t’i besojë të ardhmes së saj në portë Joan Garcias, gardianit 24-vjeçar të blerë nga Espanyoli për 25 milionë euro. Portieri spanjoll ka firmosur një kontratë afatgjatë deri në vitin 2031, duke treguar qartë strategjinë e klubit për të investuar në një talent të ri, por tashmë të pjekur.
Pas vështirësive të sezonit të kaluar, kur mungesa e gjatë e Marc-André ter Stegen detyroi rotacionin mes Szczesny-t dhe Iñaki Peñës, drejtuesit katalanas vendosën të rikthejnë stabilitetin duke siguruar një numër një të ri.
Garcia ka bindur trajnerin Hansi Flick gjatë javëve të para të stërvitjes me Barcelonën, duke impresionuar me personalitet dhe siguri mes shtyllave. “Dua të përmirësohem, të fitoj dhe të arrij gjëra të mëdha me Barcelonën”, u shpreh ai gjatë prezantimit zyrtar.
Marrëveshja u finalizua pas takimit vendimtar midis drejtorit sportiv Deco, agjentit të lojtarit Juanma López dhe avokatit Ramón Valencia. Me afrimin e sezonit të ri, katalanasit duket se më në fund kanë gjetur trashëgimtarin e Ter Stegen-it, ndërsa Joan Garcia është gati të marrë përsipër një nga pozicionet më të ndjeshme të ekipit.
