Një grup prej 34 ish-ambasadorësh të Italisë i kanë dërguar një letër publike kryeministres Giorgia Meloni, ku i kërkojnë qeverisë italiane të njohë shtetin e Palestinës dhe të ndërpresë çdo formë bashkëpunimi ushtarak me Izraelin.
Në dokumentin e publikuar nga Corriere della Sera, ish-diplomatët – mes të cilëve Pasquale Ferrara, Piero Benassi, Rocco Cangelosi, Ferdinando Nelli Feroci dhe Stefano Stefanini – akuzojnë Izraelin për shkelje flagrante të të drejtave të njeriut në Gaza, duke i cilësuar veprimet si krime kundër njerëzimit.
“Ky është momenti për të vepruar, jo vetëm për të deklaruar,” thuhet në letrën e hapur. Ata i bëjnë thirrje qeverisë italiane të pezullojë çdo bashkëpunim në fushën e mbrojtjes me Izraelin, të mbështesë sanksione ndaj zyrtarëve izraelitë që nxisin dhunën dhe vendbanimet ilegale, si dhe të bashkohet me konsensusin evropian për pezullimin e përkohshëm të Marrëveshjes së Asociimit BE-Izrael.
Një nga kërkesat kryesore është njohja e menjëhershme e shtetit të Palestinës, e cilësuar si një hap politik me peshë të jashtëzakonshme në prag të Konferencës Ndërkombëtare për zgjidhjen me dy shtete.
“Izraeli ka shkatërruar sistematikisht spitalet, shkollat dhe kampet e refugjatëve. Qindra mijëra civilë janë lëvizur me forcë dhe janë privuar nga ndihmat humanitare. Ky është momenti për të ndaluar heshtjen,” theksojnë ish-diplomatët.
Kjo është hera e parë që një grup kaq i gjerë ish-përfaqësuesish të lartë të diplomacisë italiane ndërmerr një nismë të tillë publike, duke vendosur presion politik mbi qeverinë e Melonit për të ndryshuar qëndrimin e Italisë në raport me konfliktin Izrael-Hamas.
