– Një operacion policor i zhvilluar në Portin e Selanikut ka çuar në sekuestrimin e një sasie rekord prej 271 kilogramësh kokainë, me vlerë mbi 5.5 milionë euro në tregun e zi. Droga, me origjinë nga Amerika Latine, ishte fshehur në një kontejner dhe kishte destinacion Aspropyrgosin e Greqisë.

Operacioni u realizua pas informacioneve të marra nga Agjencia Kombëtare e Krimit të Mbretërisë së Bashkuar (NCA), të cilat u transmetuan autoriteteve greke. Në bashkëpunim me Drejtorinë për Luftën Kundër Krimit të Organizuar dhe njësi të tjera policore e doganore, u ndoq një hetim i thelluar dhe u organizua një “dorëzim i kontrolluar” i ngarkesës.

Gjatë kontrollit u gjet një ndarje e modifikuar brenda kontejnerit, ku ishte fshehur droga. Tre persona u arrestuan në vendngjarje: një 47-vjeçar përgjegjës për koordinimin e operacioneve dhe komunikimin me anëtarët kryesorë të rrjetit; një 32-vjeçar i angazhuar në shpërndarjen e drogës; dhe një 40-vjeçar, pronar i një kompanie transporti, i cili kishte mundësuar përdorimin e mjeteve dhe ambienteve për fshehjen e kokainës.

Njëri prej të arrestuarve u ndalua edhe për mosbindje gjatë kontrollit, pasi refuzoi t’i nënshtrohej procedurave, dhe në banesën e tij u gjet një sasi e vogël kokainë.

Sipas autoriteteve, organizata kriminale ka një strukturë profesionale, me role të qarta dhe veprimtari të mirëorganizuar transnacionale, duke operuar në trafikun e kokainës nga Amerika Latine në Greqi me përfitime të konsiderueshme financiare.

Përveç drogës, gjatë operacionit u sekuestruan edhe pajisje të kompanisë së transportit, përfshirë vinç, makineri saldimi dhe mjete të tjera pune.

Hetimet vijojnë për identifikimin e anëtarëve të tjerë të rrjetit kriminal në Greqi dhe Amerikën Latine, përfshirë drejtuesit kryesorë të organizatës.