Kryeministrja e Italisë, Giorgia Meloni, gjatë takimit në Shtëpinë e Bardhë me liderët botërorë, vlerësoi qëndresën e ukrainasve në fushën e betejës dhe theksoi se Evropa dhe aleatët duhet të qëndrojnë të bashkuar për ta mbështetur Ukrainën.

“Nëse duam të arrijmë paqen dhe nëse duam të garantojmë drejtësi, duhet ta bëjmë të bashkuar. Padyshim që mund të mbështeteni te Italia – siç ishte që nga fillimi, ne jemi në anën e Ukrainës,” tha Meloni.

Kryeministrja italiane theksoi se çështja më e rëndësishme mbetet garancia e sigurisë, duke paralajmëruar se pa të nuk mund të ketë një paqe të qëndrueshme.

“E para është garancitë e sigurisë, si të sigurohemi që kjo të mos ndodhë përsëri, që është parakushti i çdo lloj paqeje. Jam e lumtur që do të fillojmë nga një propozim, i cili është modeli i Artikullit Pesë të NATO-s,” shtoi Meloni.

Ajo nënvizoi se Italia mbetet në krah të Ukrainës, duke kërkuar një proces paqeje të drejtë, që garanton jo vetëm ndalimin e luftës, por edhe parandalimin e çdo agresioni të ardhshëm rus.