Anulimi i fluturimeve të programuara nga Tirana drejt Ljubljanës, i cili do të shënonte rikthimin e një linje të mbyllur prej pesë vitesh, reflekton gjendjen kritike ku ndodhet sot Air Albania.

Në njoftimin e aeroportit slloven, vendimi është justifikuar me problemet financiare të kompanisë shqiptare, duke qenë episodi më i fundit i shqetësimeve mbi bilancin e saj.

Rreth një muaj më parë, punonjësit e Air Albania denoncuan një sërë shkeljesh flagrante ligjore, duke përfshirë:
• Vonesa në pagat mujore;
• Mosshlyerje të sigurimeve shoqërore për 11 muaj;
• Pushime të padrejta;
• Cenim të rëndë të sigurisë së pasagjerëve dhe stafit.

Ata raportuan se shumë punonjës kishin marrë 2 deri në 3 paga mujore me vonesë, ndërsa sigurimet shoqërore nuk ishin paguar mbi një vit. Lista e të larguarve përfshin pilota, drejtues teknikë, inxhinierë dhe ekuipazh kabine, shumica pa arsye zyrtare ose për shkak të presionit dhe mospagesave të vazhdueshme.

Në deklaratën e stafit theksohej:

“Siguria e pasagjerëve dhe e vetë punonjësve është cenuar rëndë. Presioni psikologjik, mungesa e pagave, mungesa e respektit për standardet operacionale kanë krijuar kushte që rrezikojnë jetën e qytetarëve.”

Punonjësit bënë thirrje të drejtpërdrejtë kryeministrit Rama dhe institucioneve shqiptare për:
1. Hetim të plotë të shkeljeve të raportuara;
2. Pagesën e menjëhershme të pagave dhe sigurimeve për të larguarit dhe stafin aktual;
3. Rikthimin në punë të atyre që janë pushuar padrejtësisht;
4. Garantimin e sigurisë dhe dinjitetit në punë për stafin ajror.

Ky zhvillim risjell në fokus problemet strukturore dhe financiare të Air Albania, duke vënë në dyshim vazhdimësinë e shërbimeve dhe sigurinë e fluturimeve.