Në Gjykatën Themelore në Prishtinë u mbajt më 13 gusht 2025 seanca dëgjimore për Top Kolshin, të dyshuar për vrasjen dhe groposjen e Enver Bajraktarit në fshatin Baicë, Lipjan.

Gjatë deklarimit të tij, Kolshi ka thënë se nuk kishte qëllim të vriste viktimën:

“E kam sulmuar sepse ishte në pronën time dhe më ka sulmuar. Jam penduar për atë që kam bërë dhe më vjen keq për familjen e të ndjerit.”

Mbrojtësi i të dyshuarit, avokati Halim Shala, propozoi që Kolshi të nënshtrohet një ekzaminimi psikiatrik për të vërtetuar gjendjen e tij mendore gjatë kryerjes së veprës, duke argumentuar se masa e paraburgimit duhet të shqyrtohet me kujdes. Prokurori Arben Hoti deklaroi se do të marrë parasysh këtë kërkesë dhe i kërkoi mbrojtjes dorëzimin e çdo dokumentacioni shëndetësor përkatës.

Sipas vendimit të gjykatës, Kolshi dyshohet se mes 3 gusht, ora 16:00, dhe 4 gusht, ora 12:10, për shkak të mosmarrëveshjeve paraprake, ka privuar nga jeta Bajraktarin. Viktima, teksa po dërgonte gjedhin për kullos në livadhet e fshatit, u godit me mjete të forta dhe më pas u ngufat. Trupi i tij u tërhoq disa metra, u gërmua një gropë mbi një metër dhe u mbulua me dërrasa dhe dhe, duke rivendosur edhe rrënjët e misrit.

Raporti i autopsisë konfirmoi se viktima kishte lëndime trupore dhe vdekja ishte pasojë e ngufatjes, ndërsa dëshmitarët raportuan mosmarrëveshje mes të dyshuarit dhe viktimës që datonin dy vite më parë. Pamjet e kamerave të sigurisë vërtetuan lëvizjet e Kolshit në afërsi të vendit të ngjarjes.

Gjykata ka vendosur masën e paraburgimit për Kolshin, duke marrë parasysh rrezikun e përsëritjes së veprës, mundësinë e arratisjes, peshën e veprës dhe të kaluarën kriminale të të dyshuarit, i cili kishte dy aktgjykime të mëparshme, përfshirë një të lidhur me vepra kundër jetës dhe trupit.

Ngjarja tronditi komunitetin lokal; trupi i viktimës u gjet më 4 gusht, një ditë pas raportimit të zhdukjes, ndërsa arrestimi i Kolshit u bë publik më 12 gusht.

Ky rast është nën hetime të mëtejshme nga autoritetet për zbardhjen e plotë të rrethanave të krimit.