Halkidiki, Greqi – 20 gusht 2025 – Rojë Bregdetare greke ka nisur një operacion të gjerë kërkimi dhe shpëtimi në zonën Paliouri, Halkidiki, për të gjetur një 12-vjeçar dhe një 20-vjeçar me origjinë ruse, të cilët janë zhdukur në det.
Sipas raportimeve, dy të rinjtë kishin shkuar për zhytje me maskë pasdite, por nuk u kthyen më. Pas alarmit nga të afërmit e tyre, Qendra e Unifikuar e Koordinimit të Kërkimit dhe Shpëtimit aktivizoi menjëherë një operacion emergjent.
Në zonë janë angazhuar:
• Dy anije të Rojës Bregdetare,
• Një automjet tokësor,
• Një helikopter i Forcave Ajrore,
të cilët po “krehin” çdo cep të brigjeve dhe ujërave përreth.
Megjithatë, deri tani nuk ka asnjë gjurmë të tyre. Era e fortë dhe valët e larta po e bëjnë tepër të vështirë kërkimin, duke rritur shqetësimet për sigurinë e dy të zhdukurve.
Autoritetet kanë bërë apel për kujdes të shtuar tek pushuesit dhe zhytësit, duke theksuar se kushtet e detit në zonë janë aktualisht të rrezikshme.
