Një hulumtim i fundit ka zbuluar se gratë që bëjnë fëmijën e parë pas moshës 30 vjeç kanë 40 deri në 45% më shumë gjasa për t’u prekur nga kanceri i gjirit, veçanërisht nga një formë më agresive e sëmundjes.

Sipas profesorit Weston Porter nga Universiteti “Texas A&M”, ky fenomen, i njohur si “kanceri i gjirit pas lindjes”, prek kryesisht gratë nën 45 vjeç dhe shpesh zhvillohet me një ecuri më të shpejtë. Porter shpjegon se shkaku lidhet me rritjen e qelizave inflamatore gjatë periudhës së laktacionit dhe pas saj.

Sipas të dhënave të Organizatës Botërore të Shëndetësisë (OBSH), vetëm në vitin 2022 u diagnostikuan mbi 2.3 milionë gra me kancer të gjirit, ndërsa 670 mijë humbën jetën. Edhe pse shumica e rasteve shfaqen tek gratë mbi 45 vjeç, një pjesë e konsiderueshme e vdekjeve përfshin gratë më të reja.

Ekspertët këshillojnë që gratë që planifikojnë të bëhen nëna pas të 30-ave të kryejnë kontrolle të rregullta mjekësore dhe vetë-ekzaminime për të zbuluar sëmundjen në fazat e hershme.

Profesori Porter thekson gjithashtu se ushqyerja me gji është një faktor mbrojtës, pasi ul rrezikun për zhvillimin e kancerit të gjirit.

Ky studim rikthen vëmendjen tek rëndësia e vetëdijesimit dhe parandalimit, veçanërisht për gratë që vendosin të kenë fëmijën e parë në një moshë më të avancuar.