Këngëtarja legjendare Madonna festoi ditëlindjen e saj të 67-të në Itali, duke udhëtuar drejt Sienës së bashku me partnerin e saj Akeem Morris dhe vajzat, Mercy dhe Lourdes. Momenti i veçantë u shfrytëzua për të përmbushur një ëndërr të kahershme: të shikonte garën historike me kuaj Palio, një traditë që daton që nga viti 1482 dhe mbahet pikërisht më 16 gusht.

Në një video të postuar në Instagram, Madonna rrëfeu emocionet e saj:

“Nuk ka fjalë për të përshkruar emocionin dhe madhështinë! Një ritual vërtet i shenjtë, të shohësh mijëra njerëz të heshtin para se të fillojë gara! Gara në vetvete është e papërshkrueshme.”

Pamjet nga pushimet tregojnë familjen duke kërcyer me vendasit, duke ndjekur garën, duke shijuar fishekzjarret, si dhe duke eksploruar fshatrat italiane. Vajza e saj shfaqej duke luajtur piano, ndërsa Madonna blinte objekte antike dhe shijonte momente të qeta familjare.

Për festën e ditëlindjes, ylli shijoi një tortë rozë me figurën Labubu nga koleksioni i aksion-figurave “The Monsters”, dhe për natën e veçantë veshi një korse gjysmë të tejdukshme me detaje, të kombinuar me një pallto sateni elegante.

Madonna përmbylli postimin duke i uruar vetes:

“Ëndrrat bëhen realitet.”