Detaje të reja dalin nga krimi i rëndë në Volos të Greqisë, ku Pandeli Nakoleci, 40 vjeç, dyshohet se vrau me thikë bashkëshorten e tij, Marjola Nakoleci, 36 vjeçe, para syve të njërit prej katër fëmijëve të tyre. Autori vijon të jetë në arrati, ndërsa ngjarja ka tronditur opinionin publik.

Motra e viktimës ka folur me tone të forta për Euronews Albania, duke hedhur poshtë pretendimet për probleme mendore të autorit dhe duke zbuluar detaje tronditëse për dhunën psikologjike që ai ushtronte ndaj familjes:

“Ai ishte një qen i pabesë që ia mori jetën motrës time në lule të rinisë dhe la fëmijët jetimë. Ai nuk ishte i sëmurë nga mendja, por bënte ç’i donte zemra. U bënte edhe fëmijëve dhunë psikologjike, ata kishin frikë të rrinin me të në shtëpi.”

Sipas saj, Marjola kishte kërkuar ndihmë nga policia dhe e kishte çuar bashkëshortin për ekzaminim psikiatrik, por mjekët kishin konfirmuar se ai ishte në gjendje të mirë shëndetësore. Pas dy ditësh në klinikë, ai ishte kthyer në shtëpi dhe konfliktet rifilluan.

Vrasja ndodhi në pallatin ku jetonte familja, në rrugën “Konstanta” në Volos. Sherri mes çiftit filloi në apartament dhe vijoi në hyrje të pallatit, derisa 40-vjeçari e goditi bashkëshorten me thikë në qafë dhe shpinë.

Krimi u krye në prani të vajzës së tyre 16-vjeçare, e cila ka dëshmuar para policisë:

“E pashë babin duke goditur mamin me thikë.”

Autori u largua në këmbë pas ngjarjes dhe vijon të jetë në kërkim, ndërsa policia ka përfshirë forca të shumta për kapjen e tij. Katër fëmijët e mitur janë marrë nën kujdesin e autoriteteve.

Sipas mediave greke, Pandeli Nakoleci ka qenë përdorues droge dhe në qershorin e kaluar kishte tentuar vetëvrasje. Ai ka pasur gjithashtu precedentë penalë për pjesëmarrje në organizata kriminale dhe shkelje të ligjeve për drogë.