Një incident i rëndë ka ndodhur sot në Sheshin Skënderbej, ku një grup tifozësh polakë, të cilët fillimisht u raportuan si turistë, janë filmuar duke kryer veprime të papërshtatshme poshtë bustit të Heroit tonë Kombëtar, Gjergj Kastrioti Skënderbeu.

Pas publikimit të videos, reagimet e qytetarëve kanë qenë të shumta dhe të ashpra. Mësohet se personat e shfaqur nuk janë turistë, por tifozë të klubit polak Jagiellonia Białystok, të cilët ndodhen në Tiranë për ndeshjen e sotme kundër Dinamos që do të zhvillohet në “Air Albania”.

Sipas qytetarëve dhe burimeve nga rrjetet sociale, tifozeria e Jagiellonias njihet si radikale pro-serbe dhe anti-shqiptare. Ata kanë qenë të përfshirë në incidente edhe më parë, sidomos në ndeshje ku përballen skuadra me tifozëri shqiptare.

Pas skandalit pranë bustit, tifozët janë parë gjithashtu duke shpalosur një flamur me mbishkrimin “Kosova është Serbi” në sheshin qendror të Tiranës. Në rrjetet sociale janë shpërndarë video ku dëgjohen gjithashtu kore të tipit “Vritini shqiptarët”, të cilat tifozët pretendohet se i këndojnë edhe në ndeshje të tjera.

Një qytetar shkruan:

“O këta janë tifozë të Jagiellonias që këndojnë ‘Vritini shqiptarët’ në çdo ndeshje dhe hapën flamurin ‘Kosova është Serbi’ para pesë minutash. Në Novi Pazar hapën poste të flamurit tonë me kokën poshtë. Kanë edhe video me këngë nacionaliste serbe që thonë ‘Pritini, vritini shqiptarët, hidhini nga ura’.”

Një tjetër reagim paralajmëron qytetarët:

“Ata që bënin ato xheste te statuja e Skënderbeut janë tifozë polakë të Jagiellonias. Janë radikalë pro-serbë dhe kudo që i shikoni, këndojnë kore anti-shqiptare. Bëni kujdes rrugëve.”

Policia e Shtetit pritet të reagojë për incidentin dhe të marrë masa për identifikimin dhe ndëshkimin e personave përgjegjës. Deri më tani, nuk ka një deklaratë zyrtare nëse tifozët janë shoqëruar apo jo.