Vlorë – Ka shkuar në dy numri i viktimave nga aksidenti i rëndë i ndodhur ditën e djeshme në autostradën Levan–Vlorë, pranë fshatit Panaja, në vendin e quajtur “Kripa”.

Ngjarja u regjistrua rreth orës 14:15, kur një automjet tip “Dacia” me targa AA408XY, e drejtuar nga shtetasja italiane Angela Tanzillo, 28 vjeçe, goditi nga pas një kamionçinë që drejtohej nga Alfred Hasani, 62 vjeç.

Si pasojë e përplasjes, kamionçina u përplas fillimisht me barrierat anësore dhe më pas u përmbys jashtë rruge.
• Alfred Hasani humbi jetën në vendin e ngjarjes.
• Artan Muho, i cili udhëtonte si pasagjer në kamionçinë, mbeti i plagosur rëndë dhe u dërgua me urgjencë në spital, por ndërrroi jetë rreth orës 01:00 të mëngjesit të sotëm, pasi nuk mundi t’u mbijetonte plagëve.

Shoferja italiane Angela Tanzillo u shoqërua menjëherë në komisariat dhe, sipas burimeve policore, pritet të arrestohet pas përfundimit të procedurave hetimore.

Ndërkohë, Grupi Hetimor po punon për të zbardhur plotësisht shkaqet e aksidentit, ndërsa materialet procedurale do t’i kalojnë Prokurorisë së Vlorës për veprime të mëtejshme.