Kabul – Afganistani po përballet me një katastrofë humanitare pas tërmetit të fuqishëm që goditi lindjen e vendit ditën e djeshme, duke shkaktuar më shumë se 800 viktima dhe mijëra të plagosur.
Operacionet e kërkim-shpëtimit vijojnë me intensitet, por situata mbetet dramatike. Rrugët tokësore janë bllokuar për shkak të rrëshqitjes së dherave, duke vështirësuar mbërritjen e ekipeve të ndihmës. Për këtë arsye, autoritetet kanë angazhuar helikopterë për transportimin e të plagosurve drejt spitaleve, ndërsa kërkimet për të mbijetuar po zhvillohen nga ajri.
Autoritetet paralajmërojnë se numri i viktimave pritet të rritet ndjeshëm në orët dhe ditët në vijim, pasi shumë persona ndodhen ende nën rrënoja.
Në një deklaratë të bërë sot, Talebanët i kanë bërë thirrje bashkësisë ndërkombëtare për ndihmë urgjente, duke theksuar se vendi nuk ka kapacitetet e nevojshme për të përballuar situatën.
Deri më tani:
• Mbretëria e Bashkuar ka ofruar 1 milion paund fonde ndihme.
• OKB ka nisur shpërndarjen e ndihmave ushqimore për të prekurit.
Ekspertët thonë se kjo mund të jetë një nga tërmetet më vdekjeprurëse në Afganistan gjatë dekadës së fundit, ndërsa ekipet e shpëtimit po përballen me mungesë mjetesh dhe kushte tepër të vështira terreni.
