Vlorë – Aeroporti Ndërkombëtar i Vlorës (VIA) pritet të kthehet në një nga pikat më të rëndësishme të transportit ajror në Shqipëri, duke sjellë një frymë të re zhvillimi për turizmin dhe ekonominë e jugut të vendit.

Sot, kompania zvicerane e fluturimeve “Chair Airlines” njoftoi hapjen zyrtare të linjës së re që do të lidhë Zyrihun (ZRH) me Vlorën (VLO). Fluturimi i parë do të realizohet më 26 qershor 2026, duke shënuar një moment historik për qytetin bregdetar dhe të gjithë Shqipërinë.

Ky zhvillim vjen pas një sërë hapash përgatitorë:
• Në prill 2025, Shoqata Ndërkombëtare e Transportit Ajror (IATA) i dha aeroportit të Vlorës kodin zyrtar “VLO”, duke mundësuar shitjen e biletave ndërkombëtare përmes agjencive të udhëtimit.
• Në maj 2025, aeroporti u testua për herë të parë me fluturimin certifikues, duke konfirmuar gatishmërinë teknike dhe operacionale.

Aeroporti Ndërkombëtar i Vlorës do të shërbejë si porta kryesore e hyrjes në jug të Shqipërisë, duke ofruar një impakt të drejtpërdrejtë në rritjen e turizmit dhe investimeve. Me një terminal modern prej 22 mijë metrash katrorë, aeroporti do të funksionojë mbi tre modele biznesi:
• aviacion civil për pasagjerët,
• mirëmbajtje të avionëve dhe
• shërbime kargo.

Autoritetet e turizmit dhe investitorët shprehen optimistë se linja e re nga Zyrihu do të sjellë rritje të ndjeshme të fluksit të vizitorëve dhe do të pozicionojë Vlorën si një nga destinacionet më të kërkuara në Mesdhe.