Një aksident rrugor është regjistruar mëngjesin e kësaj të marte në Elbasan, ku dy automjete janë përplasur “kokë më kokë” gjatë lëvizjes në Unazën Jugore.

Ngjarja ndodhi rreth orës 06:00 në zonën e njohur si “Lagja e Kinezëve”. Si pasojë e përplasjes, të dy automjetet pësuan dëmtime të konsiderueshme, ndërsa njëri nga drejtuesit mbeti i plagosur.

I plagosuri u transportua menjëherë në Spitalin Rajonal të Elbasanit, ku po i nënshtrohet trajtimeve dhe kontrolleve mjekësore. Burime nga spitali bëjnë me dije se gjendja e tij është e qëndrueshme dhe dëmtimet nuk paraqesin rrezik për jetën.

Në vendngjarje mbërriti policia, e cila po punon për të zbardhur shkaqet dhe rrethanat e aksidentit. Autoritetet po shqyrtojnë gjithashtu dokumentacionin e drejtuesve dhe kushtet e rrugës për të përcaktuar përgjegjësinë.