Një maxi-antenë 40 metra në Okunevo, pranë Kaliningradit, ka krijuar mijëra interferenca në sistemet e navigacionit të avionëve dhe anijeve civile që nga viti 2022, pas fillimit të pushtimit rus të Ukrainës. Objekti ndodhet vetëm 98 km larg Danzigës, në territor të Bashkimit Europian.

Ekspertët ndërkombëtarë përdorën triangulime dhe imazhe satelitore për të lokalizuar antenën. Në Bruksel, disa gjeneralë evropianë sugjeruan midis viteve 2023-2024 që antena të shkatërrohet ose çaktivizohet, kryesisht si një sinjal politik, por ideja u refuzua për shkak të kundërshtimit amerikan dhe frikës së përshkallëzimit të konfliktit.

Rrjeti rus i antenave

Antenat në Okunevo nuk janë të vetmet. Pika të tjera janë identifikuar në Baltiysk, Yantarnyy, pranë Shën Petersburgut dhe kufirit me Ukrainën, si dhe rreth 20 km nga kufiri me Estoninë. Të gjitha këto poste kontrollohen kryesisht nga Brigada e 16-të në Kursk dhe Regjimenti 218, të specializuar në luftë elektronike.

Qindra avionë që fluturojnë midis Europës dhe Lindjes së Mesme raportojnë probleme serioze në marrjen dhe transmetimin e të dhënave satelitore. Zyrtarisht, Rusia pretendon se antenat synojnë pengimin e dronëve ukrainas, por efektet ndikojnë edhe në GPS-in civil global.

Statistikat e ndikimit

Universiteti i Stanfordit: gjatë gushtit të kaluar, 90-150 avionë në ditë raportuan probleme serioze.

OpsGroup: një vit më parë, 1,400 fluturime në ditë humbnin sinjalin GPS në Europë, Lindje të Mesme dhe Rusi.

IATA: rastet e humbjes së sinjalit janë rritur me 220% midis 2021 dhe 2024, pra 56,3 raste për çdo 1,000 fluturime.