Autoriteti i Komunikimeve Elektronike dhe Postare (AKEP) ka bërë një propozim për uljen e tarifave të terminimit të thirrjeve në rrjetet fikse të telefonisë në Shqipëri, duke synuar afrimin e këtyre çmimeve me nivelin e tarifave të BE-së.

Sipas të dhënave të AKEP, tarifat e terminimit në rrjetet fikse shqiptare janë shumë më të larta krahasuar me 27 vendet e Bashkimit Europian. Aktualisht, tarifa e terminimit fiks në Shqipëri është 0.7 lekë për minutë, ndërsa në BE tarifa e përbashkët është 0.07 eurocent/minutë.

Plani i uljes së tarifave

Propozimi i AKEP parashikon një ulje graduale prej 57% gjatë periudhës mars 2026–mars 2027:
• 1 mars 2026: tarifa të ulet nga 0.7 lekë/min në 0.3 lekë/min
• 1 shtator 2026: tarifa të zbresë në 0.15 lekë/min
• 1 mars 2027: tarifa të arrijë në 0.07 lekë/min, duke e harmonizuar me nivelin mesatar të BE-së.

AKEP ka përdorur metodën benchmark, duke krahasuar tarifat me ato të vendeve të BE-së, pasi nuk ka ndërtuar ende një model të pastër BU LRIC për kostot e telefonisë fikse.

Arsyet për uljen

Autoriteti ka konstatuar:
• Rënie të ndjeshme të trafikut të thirrjeve të origjinuara nga rrjetet fikse në vitet e fundit
• Ulje të të ardhurave për operatorët e telefonisë fikse
• Zëvendësim të përdorimit të telefonisë fikse me shërbime celulare, duke reflektuar trendin global drejt komunikimeve mobile

Ky propozim synon jo vetëm reduktimin e çmimeve për operatorët dhe konsumatorët, por edhe përputhjen me praktikat ndërkombëtare dhe forcimin e konkurrencës në tregun e telefonisë fikse.