Tiranë – Partia Socialiste ka njoftuar zyrtarisht se më 11 shtator 2025, në orën 09:30, do të zhvillojë mbledhjen e Asamblesë Kombëtare. Takimi do të mbahet tek kompleksi “Xibraku” në Tiranë dhe pritet të ketë një axhendë të ngarkuar, ku do të diskutohet mbi drejtimin politik, sfidat e qeverisjes dhe përgatitjet për zgjedhjet e ardhshme.

Sipas njoftimit zyrtar të PS-së, mbledhja do të zhvillohet mbi bazën e nenit 37, pika 5 të Statutit të Partisë Socialiste, me këtë rend dite:

Rendi i ditës
1. Hapja e mbledhjes dhe miratimi i rendit të ditës
2. Fjala e kryetarit të PS-së, Edi Rama
3. Mendime, pyetje dhe diskutime
4. Të ndryshme

Në qendër të vëmendjes pritet të jetë fjala e kryeministrit Edi Rama, i cili do të mbajë fjalimin kryesor për drejtimin e partisë dhe prioritetet e qeverisë në muajt e ardhshëm. Mbledhja shihet si një moment kyç për analizën e situatës aktuale politike, sfidat ekonomike dhe përgatitjet për zgjedhjet parlamentare.

PS ka theksuar se pjesëmarrja e anëtarëve të Asamblesë është e detyrueshme, duke nënvizuar rëndësinë e këtij takimi për vijimin e punimeve dhe vendimmarrjeve brenda partisë.