Aksioni i IKMT-së për prishjen e ndërtimeve pa leje ka vijuar edhe sot në Valbonë, ku fadromat dhe forcat e policisë kanë shembur disa bujtina të ndërtuara prej druri nga banorët vendas. Godinat, të ngritura këtë vit, përbënin sipas tyre të vetmen mundësi mbijetese në një zonë të izoluar.

Mes pluhurit dhe punonjësve të IKMT-së, një çift i moshuarish shpërtheu në lot e akuza të forta. “As serbi nuk na e bënte këtë! Jemi në tokën tonë, në shtëpinë tonë! Është gjynah, shqiptari shqiptarit nuk ja bën këtë! Ky është gazep!”, tha i moshuari, duke parë bujtinën e tij tre-dhomëshe që po shembej.

Ai tregoi se ndërtimin e kishin bërë me para borxh dhe se kjo ishte e vetmja pasuri që i siguronte bukën e gojës. “Kur po e ndërtonim, erdhi policia dhe na tha: ‘Ju ecët mbarë’. Sot, na shembin gjithçka! Më mirë të na kishin pushkatuar!”, u shpreh ai me revoltë.

Edhe bashkëshortja e tij nuk i fshehu lotët: “Këto shtëpi pa na vra nuk shemben. Janë të thjeshta, punojmë për një copë bukë. E bëmë këtë vit me shumë mundim, e sot jemi pa mëshirë.”

Banorët theksojnë se bujtinat e tyre janë prej druri, pa ndikim në mjedis dhe shërbenin vetëm për turizëm familjar, ndërsa qeveria i konsideron ndërtime të paligjshme.

“30 vite ja kam dhënë votën Ramës, e sot më pushkatoi! Nuk e prisja këtë, nga vet shqiptarët!”, përfundoi i moshuari i dëshpëruar.