Dhoma gjumi, banjo, zyra mjekësh e deri tek hapësira më intime të shtëpive janë kthyer sërish në pre të një biznesi të paligjshëm që gjeneron miliona dollarë. Pas zbulimeve të javës së kaluar, kompania e sigurisë kibernetike Yarix ka identifikuar edhe dhjetë faqe të tjera interneti, të gjitha me domene të huaja, që transmetojnë pamje të vjedhura nga kamerat e mbikëqyrjes.

Faqet janë raportuar në Policinë Postare të Venecias dhe tek autoritetet gjyqësore, të cilat kanë nisur një hetim të zgjeruar mbi shpërndarjen e paligjshme të përmbajtjes. Ndërkohë, videot e marra nga kamerat në Itali janë hequr, por faqet mbeten ende aktive.

“Faqet e zbuluara përfaqësojnë vetëm një pjesë të vogël të një universi shumë më të madh dhe më të fshehur,” – shpjegoi për La Tribuna di Treviso Diego Marson, Drejtor Teknik në Yarix. Sipas tij, pas motorëve të kërkimit ekziston një rrjet paralel platformash të padukshme, të cilat funksionojnë përmes adresave të paindeksuara ose shpërndahen në biseda të mbyllura në aplikacione mesazhesh.

Videot, pasi publikohen, nuk zhduken më: “Mjafton që dikush t’i shkarkojë dhe t’i rishpërndajë, dhe zinxhiri i ndarjes bëhet i pamundur për t’u ndalur,” shton Marson.

Modeli i biznesit është i ngjashëm me rastin e mëparshëm: përdoruesit joshën me klipe falas, më pas u ofrohet blerja e aksesit në kamerat live, duke marrë praktikisht kontroll mbi to. Tarifat variojnë nga 20 deri në 600 dollarë, në varësi të popullaritetit, ndërsa disa video arrijnë deri në 20,000 shikime.

Transaksionet kryhen përmes Telegram dhe paguhen me kriptovaluta, gjë që e vështirëson identifikimin e organizatorëve. Rasti ka nxjerrë edhe një herë në pah cenueshmërinë e privatësisë së atyre që instalojnë kamera sigurie në shtëpi apo në punë.