Grupi Parlamentar i Partisë Socialiste u mblodh këtë të hënë në ambientet e Kryesisë së Kuvendit, në një takim që nisi në orën 10:00 nën drejtimin e kreut të grupit, Taulant Balla.

Në mbledhje mori pjesë edhe kryeministri Edi Rama, i cili mbërriti disa minuta pas nisjes. Kjo është mbledhja e parë e socialistëve pas Asamblesë së PS-së, ku Rama prezantoi kabinetin e ri qeveritar.

Ndërkohë, në orën 11:00, kryetari i Kuvendit, Niko Peleshi, pritet të takohet me krerët e grupeve parlamentare për të diskutuar formimin e organeve të reja të parlamentit. Gjatë takimit, ai do të paraqesë një draft me ndryshimet në Rregulloren e Kuvendit, që parashikojnë ristrukturimin e Komisioneve Parlamentare, sipas modelit të propozuar nga kryeministri Rama në Asamblenë e PS-së.