Pas valës së aludimeve për shifrat e larta të shpenzuara në dasmën e tij me moderatoren sportive Cindy Marina, Genar Topalli, djali i politikanes Jozefina Topalli, ka reaguar publikisht.

Ai sqaron se ceremonia dhe festa martesore, e mbajtur në Romë më 13 shtator 2025, është financuar nga vetë çifti dhe prindërit e Cindy-t, të cilët jetojnë e punojnë prej dekadash në SHBA.

“Edhe pse nuk kemi asnjë detyrim të japim shpjegime për jetën private, dua ta bëj këtë reagim për transparencë,” shkruan Topalli. “Ceremonia u zhvillua në Bazilikën e Shën Marisë, te Altari i Qiejve, ku nuk ka pagesë, por vetëm një donacion simbolik. Darka më pas u mbajt në një ambient në Romë, me kosto që nuk kalon shpenzimet e zakonshme të një dasme shqiptare. Gjithçka është menduar, organizuar dhe financuar prej meje dhe Cindy-t, me mbështetjen e prindërve të saj.”

Topalli thekson se familja e Cindy Marina-s zotëron biznese të suksesshme në SHBA, me mbi 150 të punësuar, ndërsa vetë ajo menaxhon një nga klubet më të mëdha të volejbollit në Kaliforninë Jugore.

Ky reagim shihet edhe si një përgjigje e drejtpërdrejtë ndaj deklaratës së ish-partneres së tij, Eva Murati, e cila pak ditë më parë nënkuptoi se dasma ishte e financuar nga “paratë e vjedhura të popullit”.

“Ky sqarim bëhet vetëm për të shmangur çdo keqkuptim dhe për të hedhur poshtë komentet me shifra krejtësisht të pavërteta e spekulative. Falënderoj me zemër të gjithë ju që na uruat në këtë ditë të shenjtë për familjen tonë,” përfundon deklarata e Topallit.
We