Ish-presidenti amerikan, Barack Obama, reagoi për herë të parë mbi vrasjen e Charlie Kirk, duke e quajtur atë një akt tragjik që thellon më tej tensionet politike në Shtetet e Bashkuara.

Duke folur në një aktivitet në Erie, Pensilvani, Obama tha se nuk e njihte personalisht Kirk dhe nuk ndante shumë nga pikëpamjet e tij, por vrasjen e konsideroi “horrific” dhe një goditje të rëndë për shoqërinë amerikane.

“Besoj se në kohë si kjo, kur tensionet janë të larta, një pjesë e detyrës së presidentit është t’i bashkojë njerëzit. Dhuna politike nuk ka vend në një demokraci,” u shpreh Obama.

Ai kritikoi retorikën përçarëse në politikën amerikane, duke nënvizuar se në të kaluarën, edhe presidentë republikanë në momente të tilla kanë zgjedhur të theksojnë unitetin kombëtar.

Shtëpia e Bardhë reagoi menjëherë pas deklaratës, duke e cilësuar Obamën “arkitektin e përçarjes politike moderne” dhe duke akuzuar demokratët se po e përdorin ngjarjen për përfitime politike.

Vrasja e Kirk, një figurë e njohur konservatore dhe themelues i “Turning Point USA”, ka tronditur skenën politike amerikane. Para arrestimit të Tyler Robinson, i akuzuar për ekzekutimin, aleatët e ish-presidentit Donald Trump fajësuan aktivistët e majtë dhe retorikën e demokratëve për nxitjen e klimës armiqësore.

Obama, megjithatë, theksoi se “Amerika ndodhet në një pikë kthese” dhe se sfida më e madhe sot është rikthimi i besimit në institucionet demokratike dhe shmangia e dhunës si mjet përballjeje politike.