Kryeministri Edi Rama prezantoi sot para deputetëve programin qeverisës për katër vitet e ardhshme, duke theksuar rëndësinë strategjike të teknologjisë dhe digjitalizimit për vendin. Ai u ndal veçanërisht te roli i ministres së re të Inteligjencës Artificiale, Diella, e cila sipas tij do të jetë kyç në përshpejtimin e procesit integrues të Shqipërisë.

“Diella, ministrja për IA, do të ushtrojë një ndikim vendimtar për përshpejtimin procesit integrues. Ai do të mbështetet nga një akselerator, i quajtur AI4, i cili do ketë lirinë e plotë të operojë me një rol të ri brenda administratës, duke thyer burokracitë. AI4 do të bashkojë talente më të mira nga brenda vendit, nga diaspora dhe edhe të huaj. Diella do ta pozicionojë bukur Shqipërinë me ambicien e madhe të qeverisjes përmes digjitalizimit dhe inteligjencës artificiale,” tha Rama.

Ky fokus nënvizon synimin e qeverisë për të kombinuar inovacionin teknologjik me politika të avancuara digjitale për të forcuar rolin e vendit në rajon dhe në procesin e integrimit europian.