Sekretari i Përgjithshëm i Partisë së Lirisë dhe kreu i grupit parlamentar të këtij subjekti, Tedi Blushi, akuzoi mazhorancën për sjellje të paprecedentë në Kuvend, teksa seanca plenare për votimin e programit qeverisës dhe kabinetit të ri u zhvillua pa debat dhe brenda pak minutash.

“Ministrja e re që kryeministri prezantoi nuk është Diella, por Linda Rama. Nuk është as ministre, por vetëm autore e aferës më të madhe në vend, afera e AKSHI-t. Ky ishte një akt i paprecedentë ku u votua për 5 minuta,” deklaroi Blushi pas daljes nga Kuvendi.

Ai hodhi akuza të rënda ndaj kryeministrit Edi Rama dhe kryeparlamentarit Niko Peleshi, duke denoncuar edhe aktin e fundit të këtij të fundit për të mos lejuar mediat në seanca. “Dua ta denoncoj këtë veprim jo të ri të kryeparlamentarit me gazetarët, nuk është herë e parë, e paprecedentë në pengesën që ju bëri të bëni misionin e detyrën tuaj. Nuk ka asnjë surprizë. Është beteje jo vetëm për opozitën por edhe për të drejtat e qytetarëve. Si gazetar shpreh solidaritet të plotë me ju. Shpreh solidaritetin me ju që ti bashkoheni,” tha Blushi, duke i bërë thirrje respektimit të transparencës dhe të lirisë së medias brenda Kuvendit.