Një aksident i rëndë është regjistruar mëngjesin e sotëm në superstradën Lezhë–Milot, pranë kryqëzimit të Ishull-Lezhë.
Në përplasje janë përfshirë tre automjete, ndërsa sipas të dhënave të para dy persona kanë mbetur të plagosur. Të lënduarit janë transportuar me urgjencë drejt spitalit të Lezhës, ku po marrin ndihmën e nevojshme mjekësore.
Nga informacionet paraprake dyshohet se shkak i aksidentit është bërë dalja e papritur në superstradë e një automjeti tip “Audi” nga një rrugë dytësore, i cili u godit nga një tjetër mjet që po udhëtonte në drejtim të Lezhës. Në përplasje u përfshi edhe një automjet i tretë, që lëvizte menjëherë pas makinës që u ndesh me “Audin”.
Në vendngjarje kanë mbërritur shërbimet e Policisë Rrugore, të cilat kanë nisur veprimet hetimore për të zbardhur rrethanat e plota dhe për të përcaktuar përgjegjësitë ligjore.
