Policia e Fierit, në bashkëpunim me strukturat e antidrogës, ka intensifikuar operacionet në brendësi të lagjeve dhe blloqeve të pallateve, me synim goditjen e grupeve kriminale dhe evidentimin e përdoruesve të lëndëve narkotike.

Kontrollet e befta janë ndërmarrë pas denoncimeve të shumta të banorëve, të cilët kanë ngritur shqetësimin për rastet e përsëritura të abuzimit me drogë në zonat e banuara, sidomos në hapësirat e izoluara pranë pallateve.

Policia bën me dije se operacionet do të vijojnë pa ndërprerje, si pjesë e një strategjie për parandalimin e shpërndarjes së drogës dhe rritjen e sigurisë publike.

Burime nga uniformat blu theksuan se një vëmendje e veçantë do t’i kushtohet edhe ambienteve të shkollave, për të shmangur përfshirjen e të rinjve në përdorim apo shpërndarje të lëndëve narkotike.