Guvernatori i Bankës së Shqipërisë, Gent Sejko, deklaroi sot se norma bazë e interesit do të mbetet 2.5 përqind, duke theksuar se vendimi u mor nga Këshilli Mbikëqyrës i Bankës së Shqipërisë.
Në një konferencë për mediat, Sejko foli edhe për zhvillimet ekonomike dhe sektorët që po ndikojnë në rritjen e vendit.
“Rritja ekonomike për vitin e ardhshëm pritet të jetë deri në 3.5 përqind. Turizmi pritet të vijojë të japë kontribut pozitiv. Inflacioni pritet të kthehet në 3 përqind në vitin 2026,” tha guvernatori.
Ai shtoi se sektori i turizmit ka ndikuar në rritjen e ekonomisë, ndërsa disa sektorë industrialë kanë pësuar rënie, duke pasur efekt negativ. Megjithatë, sipas tij, rritja ekonomike mbetet e qëndrueshme.
“Rritja ekonomike për tremujorin e dytë ka qenë 3.5 përqind. Parashikojmë rritje në këto nivele edhe në fund të vitit. Po ashtu, rritja e pagave do të ndikojë pozitivisht në ekonominë e vendit,” theksoi Sejko.
Vendimi për të mbajtur të pandryshuar normën bazë të interesit synon të sigurojë stabilitet financiar dhe të mbështesë ecurinë e rritjes ekonomike në vend.
