Mesfushori uruguaian i Real Madridit, Fede Valverde, ka reaguar publikisht pas zërave se kishte refuzuar të luante ndeshjen ndaj Kairat Almaty-t dhe se kishte tensione me trajnerin Xabi Alonso.

Përmes një komunikate në rrjetet sociale, Valverde i cilësoi raportimet e mediave “artikuj që dëmtojnë figurën time”, duke theksuar se nuk ka refuzuar kurrë të zbresë në fushë.
“E di që kam pasur ndeshje të dobëta, jam i vetëdijshëm për këtë. Nuk fshihem, gjithmonë kam dalë ballëhapur. Por nuk mund të thonë kurrsesi se kam refuzuar të luaj. Kam dhënë gjithçka për këtë klub, madje kam luajtur i dëmtuar, pa u ankuar dhe pa kërkuar pushim”, tha ai.

Valverde shtoi se marrëdhënia me trajnerin është “e mirë dhe e bazuar në besim të ndërsjellë”, ndërsa premtoi se do të luftojë deri në fund për Real Madridin.
“Kam lënë shpirtin në këtë klub dhe do ta bëj sërish, edhe kur gjërat nuk shkojnë si dua. Betohem mbi krenarinë time se kurrë nuk do të dorëzohem”, u shpreh mesfushori.

Uruguajani, i njohur për përkushtimin dhe disiplinën, mbetet një nga figurat më të rëndësishme në mesfushën e “Los Blancos”, duke synuar rikthimin e formës më të mirë pas një periudhe me luhatje.