Gazetarja Klodiana Lala ka zbuluar sot detaje nga qëndrimi në burg i ish-kryebashkiakut të Tiranës, Erion Veliaj, i cili ndodhet nën hetim për 13 akuza, prej të cilave 9 për korrupsion.
E ftuar në një emision televiziv, Lala tha se në javët e para pas arrestimit, Veliaj është përballur me një gjendje të rënduar emocionale dhe psikologjike, duke kaluar sipas saj “dimrin e vetmisë së madhe”.
“Veliaj priste protesta në mbështetje të tij, mendoi se do të kishte njerëz jashtë burgut për ta takuar. Por në fakt mbeti i vetëm. Ai ishte një kandidat potencial për të zëvendësuar Ramën, doli pa pranga nga zyra e tij, dhe kontrasti ishte i madh. Sot ai e ka kuptuar që është tradhtuar nga të gjithë,” – u shpreh Lala.
Gazetarja tregoi gjithashtu se pak kohë më parë në burg iu organizua një festë ku mori pjesë edhe djali i tij, ndërsa ambientet e institucionit ishin zbukuruar për këtë rast.
Lala theksoi se Veliaj ka ndryshuar sjellje krahasuar me ditët e para pas arrestimit, duke u bërë më i tërhequr. Sipas saj, ka patur edhe pretendime për trajtimin në qeli dhe një procedurë të hapur nga Avokati i Popullit për të verifikuar nëse i janë shkelur të drejtat.
“Ajola Xoxa nuk e ka takuar asnjëherë në burg. Vizita i kanë bërë vetëm vëllai dhe një ish-zyrtar i Bashkisë së Tiranës, Dokushi, i cili po merret me çështjen e tij,” – shtoi Lala, duke nënvizuar se për ish-kryebashkiakun “rruga e përballjes me drejtësinë do të jetë e gjatë”.
