Gjatë një vizite zyrtare në bazën e Forcave Ajrore Mbretërore (RAF) në Coningsby, Lincolnshire, Princesha e Uellsit, Kate Middleton, tërhoqi vëmendjen me një moment që u bë viral në mediat sociale.

Pamjet tregojnë princeshën duke u ngjitur dhe më pas duke zbritur shkallët anësore të një avioni luftarak Typhoon, me taka të larta, pa humbur asnjë çast ekuilibrin. Videoja, e shpërndarë gjerësisht në rrjete sociale, u shoqërua me komente si: “Duket si një sfilatë mode e lartë” dhe “E pamundur ta bësh këtë me atlete, e lëre më me ato taka”.

Në cilësinë e “Royal Honorary Air Commodore”, rol që e ka marrë në vitin 2023, Kate zhvilloi një tur në bazë, ku pa nga afër avionët luftarakë Typhoon dhe u takua me personelin dhe familjet e tyre. Ajo përshëndeti të pranishmit, pozoi për foto dhe u dallua me një gjest empatie, duke u ulur për të biseduar me një fëmijë.

Eleganca e saj kombinoi protokollin mbretëror me sofistikimin e modës. Princesha kishte veshur një kostum të strukturuar nga Bella Freud, një bluzë gri të thurur nga Alexander McQueen dhe këpucë “85 Suede Pomps” prej lëkure blu mesnatë nga Gianvito Rossi – të cilat u kthyen në detajin viral të ditës.

Ky episod konfirmoi edhe një herë aftësinë e Kate Middleton për të bashkuar rigorozitetin ushtarak me hijeshinë mbretërore, duke e kthyer vizitën zyrtare në një moment stili që pushtoi rrjetet sociale.