Ukrainë – Gazetari francez Antoni Lallican u vra të premten në mëngjes në Donbass, Ukrainë, nga një sulm me dron, në një ngjarje që Federatat Ndërkombëtare dhe Europiane të Gazetarëve (IFJ-EFJ) e kanë cilësuar si krim lufte.

Sulmi ndodhi rreth orës 09:20, ora lokale, dhe në të njëjtin incident u plagos gazetari ukrainas Heorgiy Ivanchenko. Të dy gazetarët mbanin pajisje mbrojtëse dhe jelekë anti-plumb me mbishkrimin “Press”, por kjo nuk i shpëtoi nga përplasja fatale.

“Dënojmë këtë krim lufte dhe kërkojmë nga autoritetet të fillojnë menjëherë një hetim për identifikimin e përgjegjësve,” tha IFJ-EFJ në një deklaratë, duke shprehur ngushëllimet më të thella për familjen dhe të afërmit e Lallican.

Ky është rasti i parë i regjistruar në Ukrainë ku një gazetar humb jetën nga një dron, duke rikthyer vëmendjen ndërkombëtare mbi rreziqet që përballen gazetarët në zonat e konfliktit.

Lallican, banues në Paris, ishte në Ukrainë për agjencinë e fotogazetarisë Hans Lucas, me seli në Carcassonne. Punimet e tij janë publikuar në media prestigjioze si Le Monde, Le Figaro, Libération, Mediapart, Der Spiegel, Zeit dhe Die Welt.