Një aksident i rëndë rrugor ka tronditur mëngjesin e së hënës superstradën Lezhë–Milot, në afërsi të fshatit Shënkoll, duke shkaktuar plagosjen e rëndë të një drejtuesi motoçiklete.

Sipas burimeve nga policia rrugore, në përplasje janë përfshirë dy automjete dhe një motor, ndërsa për shkak të goditjes së fortë, motoristi ka pësuar dëmtime serioze. Ai është transportuar me urgjencë drejt spitalit të Lezhës, ku po merr trajtim mjekësor.

Fatmirësisht, nuk raportohet për persona të tjerë të lënduar, ndërsa dëmet materiale janë të konsiderueshme.

Policia ndodhet në vendngjarje dhe po kryen ekspertizën për të përcaktuar shkaqet e sakta të aksidentit, ndërsa po verifikohen edhe pamjet nga kamerat e sigurisë së bizneseve pranë zonës.
Paraprakisht dyshohet se shpejtësia e lartë dhe mosrespektimi i distancës mund të kenë qenë shkaktarët e përplasjes.