Në një samiti historik për paqen në Lindjen e Mesme, presidenti amerikan Donald Trump ka nënshkruar marrëveshjen e armëpushimit për Gazën, duke e quajtur atë “momentin më të rëndësishëm diplomatik të shekullit”.
“Na u deshën 3,000 vjet për të ardhur deri këtu, a e besoni?”, tha Trump teksa firmoste dokumentin, duke theksuar se marrëveshja synon t’i japë fund përfundimisht gjakderdhjes dhe përplasjeve të vazhdueshme në rajon.
Pas presidentit amerikan, dokumentin e firmosën edhe liderë të tjerë rajonalë, përfshirë presidentin e Egjiptit Abdel Fattah el-Sisi, emirin e Katarit Tamim bin Hamad Al Thani dhe presidentin turk Recep Tayyip Erdogan, të cilët u angazhuan për zbatimin e menjëhershëm të armëpushimit.
“Të gjithë janë të lumtur”, deklaroi Trump në fund të ceremonisë, duke shtuar se megjithëse ka përjetuar shumë marrëveshje në jetën e tij politike dhe biznes, “asnjë nuk ka pasur peshën e kësaj”.
Presidenti amerikan theksoi se me këtë marrëveshje “parashikimet për një Luftë të Tretë Botërore në Lindjen e Mesme nuk do të bëhen realitet”, ndërsa ceremonia u mbyll mes duartrokitjeve dhe shpresës për një paqe të qëndrueshme në një rajon të trazuar prej dekadash.
