Kreu i Prokurorisë së Posaçme Kundër Korrupsionit dhe Krimit të Organizuar, Altin Dumani, raportoi këtë të mërkurë në Komisionin e Ligjeve, duke paraqitur bilancin vjetor të punës së SPAK për vitin 2024.

Në fjalën e tij, Dumani ngriti një alarm të fortë për presionin e jashtëm që, sipas tij, po ushtrohet ndaj institucionit nga aktorë politikë, media dhe krimi i organizuar. Ai kërkoi një reagim të bashkërenduar institucional për të mbrojtur pavarësinë e SPAK-ut dhe të prokurorëve.

“Doja të veçoja presionin e jashtëm nga aktorë politikë, mediatikë dhe krimi i organizuar që rrezikon integritetin institucional dhe të prokurorëve, duke kërkuar një reagim të koordinuar për mbrojtjen e pavarësisë kushtetuese,” – theksoi Dumani.

Një tjetër problem i madh, sipas tij, mbetet mungesa e një përcaktimi të qartë ligjor për statusin e prokurorëve pas përfundimit të mandatit, gjë që krijon pasiguri dhe mund të ndikojë në vijimësinë e hetimeve të rëndësishme.

“Mungesa e përcaktimit të qartë ligjor për statusin e prokurorëve pas përfundimit të mandatit krijon pasiguri dhe mund të cenojë vijimësinë e hetimeve,” – shtoi ai.

Dumani theksoi gjithashtu se numri i ulët i referimeve nga institucionet publike për çështje që lidhen me korrupsionin dhe krimin e organizuar mbetet një shqetësim serioz, duke nënvizuar se bashkëpunimi ndërinstitucional është thelbësor për forcimin e shtetit ligjor.

Raportimi i kreut të SPAK vjen në një periudhë të ndjeshme për drejtësinë shqiptare, me hetime të hapura që prekin figura të rëndësishme politike dhe ekonomike në vend.