Gjykata e Posaçme Kundër Korrupsionit dhe Krimit të Organizuar (GJKKO) ka vendosur që Eria Ago, ish-e dashura e Safet Bajrit, të vijojë të qëndrojë në burg. Trupa gjykuese rrëzoi kërkesën e saj për zëvendësim të masës së sigurisë, duke mos pranuar pretendimet për pafajësi.

Ago u arrestua në muajin mars të këtij viti, pasi dyshohet nga SPAK se ka drejtuar një nga automjetet e përdorura në vrasjen e Fatbardh Liçit, ngjarje e ndodhur në gusht të vitit 2018 në lagjen Kiras të Shkodrës.

Megjithëse 31-vjeçarja ka mohuar çdo përfshirje, duke pretenduar se nuk ka pasur lidhje me atentatin, gjykata nuk i ka marrë parasysh deklarimet e saj.

Për ekzekutimin e Fatbardh Liçit, SPAK ka ngritur akuza të rënda ndaj Safet Bajrit, Behar Bajrit dhe Astmer Bilalit për “vrasje me paramendim”, kryer në formën e grupit të strukturuar kriminal, si dhe për “kryerjen e veprave penale nga organizata kriminale”.

Vendimi i sotëm i GJKKO-së forcon pozitën e akuzës, ndërsa hetimet për zbardhjen e plotë të vrasjes së Liçit vijojnë nën drejtimin e Prokurorisë së Posaçme.