Gjykata e Fierit ka vendosur masën e sigurisë “arrest me burg” për Milasim Ramajn, 38 vjeç, i cili u arrestua më 11 tetor pasi kishte kthyer një banesë të pabanuar në lagjen “Kastriot” në magazinë armësh.
Vendimi u mor nga gjyqtarja Klodiana Kryeziu, ndërsa Ramaj u njoh sot me masën e sigurisë.
Sipas hetimeve, arrestimi i tij erdhi pas një denoncimi nga një emision investigativ, ku raportoheshte se një person posedonte pa leje armë zjarri. Pas lokalizimit, policia ndaloi Ramajn ndërsa lëvizte me automjet dhe gjatë kontrollit iu gjet një pistoletë pa leje dhe 3.500 euro në para cash.
Kontrolli më pas në ambientin e përdorur prej tij zbuloi një arsenal të vërtetë armësh, ku u sekuestruan:
• 10 armë zjarri automatike, 3 prej tyre të modifikuara me shënjestër optike e filet për silenciator,
• 2 pistoleta (një automatike),
• 2 silenciatorë,
• 9 karikatorë automatiku,
• 3 karikatorë pushke,
• 2 krehra pistolete,
• dhe sasi fishekësh të kalibrave të ndryshëm.
Sipas policisë, armët dhe municioni luftarak dyshohet se ruheshin nga Ramaj me qëllim shitjen tek grupe kriminale. Hetimet për origjinën dhe destinacionin e armëve vijojnë.
