Dibër – Seksioni për Hetimin e Krimeve Ekonomiko-Financiare finalizoi operacionin policor të koduar “Skaneri”, duke vënë në pranga një 42-vjeçar gjatë transportimit të mallrave të kontrabanduara nga RMV-ja.

Në kuadër të operacionit, u arrestua gjithashtu një doganier 51-vjeçar i Degës Bllatë, i dyshuar për korrupsion pasiv dhe shpërdorim detyre, ndërsa një tjetër doganier, 50 vjeç, është vënë nën hetim në gjendje të lirë për shpërdorim detyre.

Gjatë kontrollit u sekuestruan mallrat e kontrabanduara, automjeti tip “Opel” dhe një sasi parash në valuta të ndryshme. Hetimet treguan se dy doganierët dyshohet se kanë favorizuar 42-vjeçarin në kryerjen e veprimtarisë kriminale.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme ligjore.

Veprimtaria e operacionit tregon efikasitetin e strukturave hetimore në zbardhjen e rasteve të kontrabandës dhe korrupsionit në dogana.